Акафист святым новомученикам Васильевским

АКАФИСТ СВЯТЫМ НОВОМУЧЕНИКАМ ВАСИЛИЕВСКИМ:
священномученику Сергию и иже с ним мученикам Прохору и Кириллу.

Кондак 1

Взбранное воинство Небеснаго Царя восхвалим, священномученика Сергия богомудраго, и с ним Прохора и Кирилла всехвальных! Тии бо пред безбожными Христа исповедаша и даже до смерти веру сохраниша, темже со дерзновением молятся за род наш. Мы же, воспоминающе подвиги их, со умилением зовем: Радуйтеся, Сергие, Прохоре и Кирилле, мученицы Христовы всехвальнии.

Икос 1

От лет древних лицы мученичестии украшение бысть Церкве, и в последняя лета не остави Господь род наш, обаче яви новыя страстотерпцы, иже Бога прославиша и веру утвердиша. Людие же христолюбивии, на подвиги новомучеников взирающе, воспевают:

Радуйтеся, свидетели Христовы;

радуйтеся, избранницы Божии.

Радуйтеся, твердии адаманты веры;

радуйтеся, камение драгии диадимы церковныя.

Радуйтеся, Церкве красото;

радуйтеся, всего мира радование.

Радуйтеся, Сергие, Прохоре и Кирилле, мученицы Христовы всехвальнии.

 Кондак 2

Видяще дерзость безбожных, Сергий пресвитер ревностию по Бозе возгореся, и даже до смерти Господа возлюбив, жизни своея не пощаде, темже и по смерти, купно со Прохором и Кириллом просвещает умы и сердца верных вопити Господеви: Аллилуиа.

Икос 2

Разум Божественный имущии мученицы, прещений не убояшася, мучения же нивочтоже вменивше, в радости поприще подвига проидоша. Сего ради слышат от нас пения сицевая:

Радуйтеся, искушения диавольския препобедившии;

радуйтеся, венец правды от Господа приявшии.

Радуйтеся, твердии в вере;

радуйтеся, во уповании не посрамленнии.

Радуйтеся, любве Христовой светильницы;

радуйтеся, всеми добродетельми украшеннии.

Радуйтеся, Сергие, Прохоре и Кирилле, мученицы Христовы всехвальнии.

Кондак 3

Сила Божия новых мучеников укрепи в подвизех, темже и добропобедницы явишася, наши же и доднесь ходатаи, и веры учителие, и благочестия наставницы; имиже наученнии, Господеви поем: Аллилуиа.

 Икос 3

Имуще безбожнии ненависть ко храму Божию, восхотеша той разорити, святыню же уничижити; обаче ничтоже успеша, яко мученицы силою Божиею храм сохраниша, нас же всех подвигоша пети сице:

Радуйтеся, храма Божия блюстители;

радуйтеся, верных хранители.

Радуйтеся, безбожных ниспровержение;

радуйтеся, верных крепкое утверждение.

Радуйтеся, света Христова свещи;

радуйтеся, мрака безбожнаго отгнатели.

Радуйтеся, Сергие, Прохоре и Кирилле, мученицы Христовы всехвальнии.

Кондак 4

Буря богоборчества на землю нашу прииде, мнозех же от пути праваго отврати, обаче мученицы пред новым Ваалом колена не преклониша, имени же Христова не отвергошася, верно поюща Богови: Аллилуиа.

Икос 4

Слыша Сергий, добрый пастырь сый, яко людие гладом гибнут, восхоте помощи тем, обаче святыни церковныя на поругание безбожных не отдаде и, велия мучения приим, ныне во славе пребывает купно со сподвижники своими Кириллом и Прохором, от нас слышаще сия:

Радуйтеся, святителя Тихона послушатели вернии;

радуйтеся, священномученика Прокопия ученицы.

Радуйтеся, людем гладным помогающии;

радуйтеся, от глада духовнаго избавляющии.

Радуйтеся, Николаевскаго края красото;

радуйтеся, всея земли полуденныя украшение.

Радуйтеся, Сергие, Прохоре и Кирилле, мученицы Христовы всехвальнии.

Кондак 5

Боготечную звезду яви Господь вас, прехвальнии мученицы, мрак неведения разгоняющую, верных же наставляющую ко истинному Богопочитанию, яко да вси людие воспоют Богови: Аллилуиа.

Икос 5

Видеша безбожницы твердую веру вашу, потщашася сокрушити ту мученьми, обаче посрамишася; мученицы же, силою Христа Господа укрепляемии, искушений пламень проидоша, и, в покой изведеннии, слышат от всех верных похваления сицевая:

Радуйтеся, огнь и воду безбоязненно прошедшии;

радуйтеся, муки и страдания за Христа приемшии.

Радуйтеся, древеса райския многоплодныя;

радуйтеся, насажденнии Господем в вертограде небеснем.

Радуйтеся, источницы воды живыя;

радуйтеся, напоители всех жаждущих.

Радуйтеся, Сергие, Прохоре и Кирилле, мученицы Христовы всехвальнии.

 Кондак 6

Проповедницы веры и нечестия обличители явишася мученицы новии, не токмо веси Василиевския, но и всея земли нашея людей подвизающии, презирающе искушения, верно Господеви служити, выну вопиюще Тому: Аллилуиа.

Икос 6

Возсиявый во мраке мучений Господь укрепи Сергия священнаго, яко да принесет жертву чисту и непорочну, себе самаго священнодействуя, страдальцев же иных укрепляюще. Темже мученицы заколение явишася приятное Богови, нас же всех подвигоша пети святым тако:

Радуйтеся, храмы Христовы одушевленнии;

радуйтеся, жертвы Богоприятнии.

Радуйтеся, заколения вольнии;

радуйтеся, всесожжения самохотнии.

Радуйтеся, кровь свою за Христа пролившии;

радуйтеся, Кровию Христовою укрепленнии.

Радуйтеся, Сергие, Прохоре и Кирилле, мученицы Христовы всехвальнии.

 Кондак 7

Хотяй всем человеком спастися и в разум истины приити, Христос яви сокровище велие Церкви Своей святей, честныя мощи мучеников новых, Сергия, Прохора и Кирилла. Вернии же, останки мученичестии лобзающе, радостно поют Господеви: Алллилуиа.

Икос 7

Новаго Завета Кровию омытии, своею же кровию украсившии ризы своя, мученицы новии предстоят ныне Престолу Господа славы, слышаще от нас пения таковая:

Радуйтеся, ветхость греховную победившии;

радуйтеся, во обновленней жизни живущии.

Радуйтеся, от временных болезненно изшедшии;

радуйтеся, к вечным радостно пресельшиися.

Радуйтеся, временными муками блаженство вечное обретшии;

радуйтеся, от привременных к вечным наставницы.

Радуйтеся, Сергие, Прохоре и Кирилле, мученицы Христовы всехвальнии.

Кондак 8

Странное чудо видим и преславное, яко человецы немощнии злобу диавольскую превозмогоша, силою же Божиею не токмо души своя сохраниша, но и храм рукотворенный соблюдоша, яко да в том собраннии вернии всегда воспевают: Аллилуиа.

Икос 8

Весь мир мучеников воспевает, обаче сродницы их в веси Василиевстей лика похвальнаго являются первостоятели, воспевающе тако:

Радуйтеся, сродницы наши преславнии;

радуйтеся, хранителие веси вашея.

Радуйтеся, о присных вам молитвенницы;

радуйтеся, о ближних ваших ходатаи.

Радуйтеся, всего мира красото;

радуйтеся, веси вашея украшение Богодарованное.

Радуйтеся, Сергие, Прохоре и Кирилле, мученицы Христовы всехвальнии.

Кондак 9

Всякое естество человеческое удивися великому мучеников дерзновению, яко тии мучений не убояшая, и лютых безбожников посрамиша, посреде мучений непоколеблеми бывше, Господеви поюще победную песнь: Аллилуиа.

Икос 9

Ветии сладкогласнии являются мученицы новии, Господа проповедающии и к жизни христианстей наставляющии; того ради мы поем им любовию:

Радуйтеся, Царства Божия проповедницы;

радуйтеся, Евангелия изряднии провозвестницы.

Радуйтеся, Суда грядущаго возвестители;

радуйтеся, неверия обличители.

Радуйтеся, риторы богогласнейшии;

радуйтеся, учители веры непреложнии.

Радуйтеся, Сергие, Прохоре и Кирилле, мученицы Христовы всехвальнии.

 

Кондак 10

Спасти хотяй мир, яви Господь в последняя лета мучеников Своих новых, тии же кровию своею Истину Христову засвидетельствовавше, верных научиша воспевати Богови: Аллилуиа.

Икос 10

Стена тверда и покров являются молитвы мучеников всем любителем благолепия церковнаго; ихже молитвами, Господи, и храмы душ наших соблюди, да в чистоте и правде восхвалим чудных подвижников тако:

Радуйтеся, на камени веры утвержденнии;

радуйтеся, веру нерушиму сохраняющии.

Радуйтеся, надеждою несумненною огражденнии;

радуйтеся, упование верным дарующии.

Радуйтеся, любовию Христовою преукрашеннии;

радуйтеся, любовь в сердцах наших возжигающии.

Радуйтеся, Сергие, Прохоре и Кирилле, мученицы Христовы всехвальнии.

Кондак 11

Пение ангельское слышите ныне, Сергие, Прохоре и Кирилле, и в небесней славе пребывающе, со всеми небесными силами славословите Христа, и нас на земли подвизаете вопити непрестанно: Аллилуиа.

Икос 11

Светом Христовым просвещеннии, явистеся светильницы миру всему, достохвальнии, мрак неведения разгоняющии, верных же ко спасению путеводствующии. Сего ради слышите от нас умильныя хвалы:

Радуйтеся, лучи истиннаго Солнца правды;

радуйтеся, силою Божиею пожигающии неправду.

Радуйтеся, светильницы невечерняго света;

радуйтеся, во мраце жития живущих освещающии.

Радуйтеся, яко свет Христов вас светло просвети;

радуйтеся, яко сияние подвигов ваших души наша освещает.

Радуйтеся, Сергие, Прохоре и Кирилле, мученицы Христовы всехвальнии.

Кондак 12

Благодать Божия сохрани мощи ваша, мученицы блаженнии, во свидетельство чадам вашим, яко кости праведных воистину процветают; сего ради вас, яко живых сущих с нами почитающе, Господеви верно покланяемся, православно воспевающе Тому: Аллилуиа.

Икос 12

Поюще подвиги ваша и злострадания, еще же и славу воспевающе, уповаем на силу молитв ваших, достоблаженнии Сергие, Прохоре и Кирилле, дивнии сродницы наши. Приимите же от уст наших словеса похвальная сия:

Радуйтеся, древним мученикам равнии; радуйтеся, подвижницы славнии.

Радуйтеся, страстотерпцы терпеливодушнии; радуйтеся, искуснии врачеве душ и телес.

Радуйтеся, молитвы наша Господеви приносящии; радуйтеся, о сродниках ваших присно молящиися.

Радуйтеся, Сергие, Прохоре и Кирилле, мученицы Христовы всехвальнии.                 

Кондак 13

О, прехвальнии угодницы Христовы, священномучениче Сергие с мученики Прохором и Кириллом, добрый подвиг совершившии и веру соблюдшии, того ради и на небесех в вечней славе Господеви предстоящии! Не оставите нас, сродников ваших, молитвами своими, испросите нам у Бога душ спасения и всех, яже ко спасению потребных! Умолите Творца, да сподобит и нас купно с вами присно воспевати Господеви песнь радования: Алллилуиа!

(этот кондак читается трижды, затем икос 1 и кондак 1).

Икос 1

От лет древних лицы мученичестии украшение бысть Церкве, и в последняя лета не остави Господь род наш, обаче яви новыя страстотерпцы, иже Бога прославиша и веру утвердиша. Людие же христолюбивии, на подвиги новомучеников взирающе, воспевают:

Радуйтеся, свидетели Христовы;

радуйтеся, избранницы Божии.

Радуйтеся, твердии адаманты веры;

радуйтеся, камение драгии диадимы церковныя.

Радуйтеся, Церкве красото;

радуйтеся, всего мира радование.

Радуйтеся, Сергие, Прохоре и Кирилле, мученицы Христовы всехвальнии.

Кондак 1

Взбранное воинство Небеснаго Царя восхвалим, священномученика Сергия богомудраго, и с ним Прохора и Кирилла всехвальных! Тии бо пред безбожными Христа исповедаша и даже до смерти веру сохраниша, темже со дерзновением молятся за род наш. Мы же, воспоминающе подвиги их, со умилением зовем: Радуйтеся, Сергие, Прохоре и Кирилле, мученицы Христовы всехвальнии.

 

Молитва

О, святии мученицы, Сергие, Прохоре и Кирилле, теплии о нас ходатаи и усерднии пред Богом молитвенницы! Во умилении сердец предстояще пред святым образом вашим [или: честными мощами вашими], смиренно молимся: услышите нас, грешных и недостойных, обремененных страстьми и леностию отягченных! Явите нам милости своя, воздвигните нас молитвами вашими из глубины греховныя, просветите ум, умягчите сердце, умирите вражду и ненависть искорените. Молите милостиваго Господа, да покрыет множество наших грехов и в добродетели нас укрепит. Да соблюдет Церковь Свою Святую в мире, сохраняюще Ю от расколов, ересей и соблазнов. Да дарует стране нашей мир и благоденствие. Всех же нас да покрыет Бог всесильною десницею Своею, соблюдающе от всякаго зла, да оградит нас Ангелы Своими во вся дни жизни нашея, во еже неосужденно преити коемуждо поприще свое, и по исходе от жития сего предстати нам Престолу Господа Славы, идеже купно с вами и всеми святыми славити пресвятое и достопокланяемое имя Отца и Сына и Святаго Духа во веки веков. Аминь.

ТРОПАРЬ, глас 1

Сродницы наши преславнии, кровьми своими землю нашу освятившии, и ярость безбожников угасившии, священнейший Сергие со мужемудренными Прохором и Кириллом! Вознесите моления ваша ко Престолу Владыки Христа, да избавит от напастей верныя люди своя, да пробавит щедрыя милости всем, чтущим любовию святую память вашу.

КОНДАК, глас 3

Возбранному Воеводе Христу добре послужившии, и одежду поруганий якоже царcкую порфиру приемшии, новии мученицы земли нашея, Сергие священный и Прохоре со Кириллом мужественнии! Молите присно Владыку Христа, да утвердит веру Правую в земли нашей, всех же верных от напастей и искушений оградит, да зовем радостно: радуйтеся, Сергие, Прохоре и Кирилле, блаженнии страстотерпцы и молитвенницы за род наш!