АКАФИСТ святой блаженной Иулитте исповеднице

Кондак 1

   Избранная угоднице земли нашея, в годину лютых испытаний свет веры Христовой пронесшая и многия люди на путь истинный наставившая, похвальная ти восписуем пения, ты же яко предстательница и молитвенница о душах наших, приими от усердия приносимая хваления наша:

Радуйся, блаженная мати Иулитто, веры Православныя исповеднице предивная.

Икос 1

Ангела дивна веси Петровстей и всей земли нашей яви тя Господь, блаженная мати Иулитто, и даром прозрения и душ людских вразумления обогати. Мы же дивящеся многострадальному житию твоему, усердно вопием таковая:

Радуйся, ангельскаго жития уподобление;
Радуйся, Святыя Троицы пречистое селение.
Радуйся, земли нашея всечудное украшение;
Радуйся, веси Петровския дивное прозябение.
Радуйся, благословением преподобнаго Ионы напутствованная;
Радуйся, от смерти многажды избавленная.
Радуйся, в послушании родителем воспитанная;
Радуйся, храм Божий возлюбившая.
Радуйся, блаженная мати Иулитто, веры Православныя исповеднице предивная.

Кондак 2

Видяще родители и знаемыя стремление твое ко святыням Лавры Киево-Печерския, не возбраниша ти с ними идти. Ты же, зрящи храмов ея великолепие и познавши благодать Божию, тамо пребывающую, возопи Богови: Аллилуия.

Икос 2

Разумом Божественным просвещенная, блаженная мати Иулитто, обаче грамоты книжныя не познавши, но память имущи чисту, многия песнопения церковныя знала еси и службу Божию пением своим украшала еси. Сего ради приими от нас похвалы сицевая:

Радуйся, талант, Богом данный, не сокрывшая;
Радуйся, добродельми светлоукрашенная.
Радуйся, пение церковное всем сердцем возлюбившая;
Радуйся, райскую сладость в молитве предвкусившая.
Радуйся, пением души молящихся в храме услаждавшая;
Радуйся, пети Богови даже до смерти не преставшая.
Радуйся, в молитве утешение обретшая;
Радуйся, тою нас от бед и напастей сохраняющая.
Радуйся, блаженная мати Иулитто, веры Православныя исповеднице предивная.

Кондак 3

Силою Божественныя благодати укрепляема, Иулитто блаженная, подвиг жития твоего в послушании и труде совершила еси, чад своих в вере и благочестии наставляющи, Богу же непрестанно зовущи: Аллилуия.

Икос 3.

Имуще от Бога дар терпения, в скорбех земных николиже возроптала еси, темже и нас, к тебе вопиющих, научи надежду и упование токмо на Бога возлагати, да молитвами твоими укрепляеми, взываем ти сице:

Радуйся, образе кротости и смирения,
Радуйся, наставнице воздержания;
Радуйся, чада своя благочестивому житию научавшая;
Радуйся, дух уныния непрестанною молитвою отгоняющая.
Радуйся, немощию своею силу диавола посрамившая,
Радуйся, силою Божиею бесовския козни поправшая;
Радуйся, свече, молитвою пламенеющая,
Радуйся, нам путь спасения озарающая;
Радуйся, блаженная мати Иулитто, веры Православныя исповеднице предивная.

Кондак 4

Буря недоумения смути ближних твоих, егда узреша тя сном тридневным уснувшую, а послежде видение дивное сказующую. Ты же с твердым упованием на Господа Иисуса Христа возопила еси: Аллилуия.

Икос 4

Слышаша людие веси Петровския о сновидении твоем, дивляхуся зело. дщерь же твоя, повеление приимше, записала есть глаголы неизреченныя, гласом всетаинственным ти реченныя. Мы же Бога, Дивнаго во святых Своих прославляюще, воспеваем ти:

Радуйся, свеще, во тьме нечестия пламенеющая;
Радуйся, светом небесным нас просвещающая.
Радуйся, от пути греховнаго многих отвращающая;
Радуйся, огня геенскаго твоими молитвами нас исхищающая.
Радуйся, от безбожных многия скорби приимшая;
Радуйся, беззаконие и нечестие всемудренне обличавшая.
Радуйся, к покаянию всех призывавшая;
Радуйся, волю Божию людем возвещающая.
Радуйся, блаженная мати Иулитто, веры Православныя исповеднице предивная.

Кондак 5

Боготечней звезде уподобилася еси, блаженная Иулитто, егда дар прозрения обилен в тебе явися, егоже чрез все житие смиренно пронесла еси, возвещающи людем волю Божию и вразумление им подающи. Сего ради благодарственно вопием Богу: Аллилуия.

Икос 5

Видевше людие тя недвижимо лежащую, дивляхуся, како ты не видящи никогоже, называла еси кождо по имени и глаголала еси им словеса, ихже сбытие чрез многа лета быша. Сего ради и мы дивящеся сему, вопием ти:

Радуйся, храмов Божиих осквернение и разрушение предуказавшая;
Радуйся, глад велий, страну нашу постигший, предзревшая.
Радуйся, недоумения людския разрешавшая;
Радуйся, от смерти приходивших к тебе спашая.
Радуйся, Димитрия некоего в непочитании родителей обличившая;
Радуйся, сиротам малолетним помощь чрез дщерь свою пославшая.
Радуйся, сосуде, благодатию преисполненный;
Радуйся, чудес источниче неистощимый.
Радуйся, блаженная мати Иулитто, веры Православныя исповеднице предивная.

Кондак 6

Бурю скорбей различных и гонений за проповедь веры и покаяния претерпела еси, мати всеблаженная, но яко светильник горящий и любовию ко Господу пламенеющий явилася еси, егоже не возмогоша стены узилищныя укрыти. Темже и мы, свет веры твоея зряще, Бога прославляем и вопием: Аллилуия.

 Икос 6

Возсия свет Божий чрез тебе, мати Иулитто, егда, заключена сущи в лечебницу града Херсона, лекарей и прочих людей удивила еси даром прозрения, Богом тебе данным. Сие чудо прославляюще, и мы зовем ти:

Радуйся, узы многия претерпевшая;
Радуйся, даром прозорливости неверующих вразумившая.
Радуйся, праздники Божии почитати всех научающая;
Радуйся, неверие и суеверие обличившая.
Радуйся, кадило молитвы, присно благоухающее,
Радуйся, звездо светозарная, верныя озараяющая,
Радуйся, утешение нам присно ниспосылающая,
Радуйся, благодатные дары от Господа подающая,
Радуйся, блаженная мати улитто, веры Православныя исповеднице предивная.

Кондак 7

Хотящи Бога, Дивнаго во святых Своих прославити и скорбь имуще о поругании святынь христианских, ходатайствовала еси об открытии храмов Божиих, да возмогут людие православнии внити во дворы Господни и радости исполняющеся, песнь со ангелы и всеми святыми воспоют: Аллилуия.

Икос 7

Новую тя молитвенницу и исповедницу веры Православныя дарова Господь в годину лютую земли нашея, ты же, блаженна мати Иулитто, наставляла еси всех словом и образом благочестивым жития своего. Людие же зряще дивная дела Божия на тебе, явленная, похвалы тя сицевыми воспеваху:

Радуйся, мати, в молитве денно и нощно пребывавшая;
Радуйся, лампады пред образами святыми в праздничныя дни возжигавшая.
Радуйся, светом небесным осиянная;
Радуйся, Духом Божиим осененная.
Радуйся, путем  тесным в радость Господа возшедшая;
Радуйся, молитвою страсти поправшая.
Радуйся, никого же скорбящим оставляющая;
Радуйся, любовию своею всех нас обымающая.

Радуйся, блаженная мати Иулитто, веры Православныя исповеднице предивная.

Кондак 8

Странно людем неверующим и неразумным бысть чудо, како тебе немощней, паче же знания и грамоты не ведущей, дивныя дела и мысли открывахуся. Мы же силе Божией, в немощи твоей совершаемей, дивящеся, вопием подателю благих Богу: Аллилуия.

Икос 8

Всяческая досаждения, гонения и обиды от власть предержащих претерпела еси, блаженная мати Иулитто. На сия зряще, и мы научаемся благодарити Бога за вся, Промыслом Его нам низспосылаемыя, тебе же со умилением взывати тако:

Радуйся, дивнаго видения от святителя Николая сподобившаяся;
Радуйся, ключи от храмов, темниц и жилищ от него преславно приявшая;
Радуйся, от убиения заступлением мученицы Иулитты избавленная;
Радуйся, язвы и раны, за Христа приятыя, в телеси твоем носившая.
Радуйся, страстей Христовых преславная сонаследнице;
Радуйся, Воскресения Его сопричастнице.
Радуйся, блаженная мати Иулитто, веры Православныя исповеднице предивная.

Кондак 9

Всякия гонения, поношения, болезни тяжкия претерпела еси, блаженная, до кончины же твоея пребывала еси непоколебима в вере Православней, молящися за всех и непрестанно поющи Богу: Аллилуия.

Икос 9

Ветии многовещанныя не возмогут уразумети, како ты немощна телесем, но не духом суще, претерпела еси всякия напасти и скорби Христа ради. Мы же дивная дела Божии на тебе зряще, псаломски хвалим Его, тебе же дерзаем пети таковая:

Радуйся, терпением своим ангелом удивившая;
Радуйся, демонския немощныя дерзости преславно поправшая.
Радуйся, яко в немощнем твоем телеси сила Божия явишася;
Радуйся, яко светом подвигов твоих вся земля наша освятишася.
Радуйся, светом небесным осененная;
Радуйся, от смерти лютыя святителем Николаем избавленная.
Радуйся, утешение нам присно низпосылающая,
Радуйся, благодатные дары от Господа подающая;
Радуйся, блаженная мати Иулитто, веры Православныя исповеднице предивная.

Кондак 10

Спасения ради нашего крестныя страдания Претерпевый, Подвигоположник наш Господь сподоби тя, мати всеблаженная, страти Своея сопричастницею быти и попусти ти заключение в степи казахстанстей, идеже  просящи у Него помощи и укрепления во страданиих, взывала еси в молитве: Аллилуия.

Икос 10

Стена нерушимая и покров бысть тебе Господь во вся дни исповедническаго подвига твоего, блаженная мати Иулитто, на Него же всю надежду возлагала еси и Ему за всех, скорбьми отягченных, молилася еси. Потщися же и ныне молитвами твоими на помощь и нам, к тебе вопиющим:

Радуйся, заключение тяжкое без ропота претерпевшая;
Радуйся, венец небесный приявшая.
Радуйся, в стужу и хлад лютый молитвою согреваемая;
Радуйся, на пути добродетелей светло наставляемая.
Радуйся, одоление врагов предвозвестившая;
Радуйся, победу в день триех праздников предзревшая.
Радуйся, мглу уныния отгоняющая;
Радуйся, души наша радостию наполняющая.
Радуйся, блаженная мати Иулитто, веры Православныя исповеднице предивная.

Кондак 11

Пение хвалебное приносим ти, блаженная матиИулитто, воспевающе исповеднический подвиг жития твоего. Научи и нас,  како подобает уповати на Бога, в Троице Пресвятей покланяемаго, Ему же ты непрестанно взываеши: Аллилуия.

Икос 11

Светом незаходимым веры Православныя осиянная, всеблаженная, сподобилася еси неврежденно прейти скорбный путь жития твоего и достигнути Царствия Божия. Сподоби и нас молитвами твоими богоугодно преплыти море житейское и услыши нас, зовущих ти:

Радуйся, души наша благодатию Божией просвещающая;
Радуйся, сердца наша питием благочестия напояющая.
Радуйся, ангельскими лики прославляемая;
Радуйся, человеческими соборами воспеваемая.
Радуйся, подвижниками присно ублажаемая;
Радуйся, людьми православными присно похваляемая.
Радуйся, от адския муки нас изымающа;
Радуйся, молитвами твоими райския врата нам отверзающая,
Радуйся, блаженная мати Иулитто, веры Православныя исповеднице предивная.

Кондак 12

Благодатию Божиею обильно напоенная, достигла еси мирнаго и непостыднагоскончания жития твоего. Мы же веруем, яко и по отшествии твоем не оставляеши молитв твоих о нас, заступления твоего просящих, Господеви же поющих: Аллилуия.

Икос 12

Поюще подвиги твоя, мати Иулитто, хвалим и благодарим Дивнаго во святых Своих Господа, даровавшего земли нашей тя яко стену необориму и столп несокрушим веры Православныя, верныя вразумляющую и молитвами своими присно защищающую от бед всех, поющих сице:

Радуйся, отшествие свое от временныя жизни предзревшая
Радуйся, многажды сию людем предвозвестившая.
Радуйся, и по смерти нас не оставляющая;
Радуйся, у престола Божия молитвы о нас возносящая.
Радуйся, о земли нашей присная ходатаице;
Радуйся, милостей Божиих преславная раздаятельнице.
Радуйся, веси Петровстей похвало и утвержение,
Радуйся, собора святых Александрийских преизрядное украшение.
Радуйся, блаженная мати Иулитто, веры Православныя исповеднице предивная.

Кондак 13

О, блаженная мати Иулитто, твердая исповеднице веры Христовыя, услыши нас, немощных и малодушных, дерзающих воспевати ти пение сие малое, испроси нам у Господа нашего Иисуса Христа непоколебимыя веры и упования на Него, да грехов наших оставление приимше, сподобимся в селениих Небесных вкупе с тобою славити Его и воспевати: Аллилуия.

Молитва

О, предивная угоднице Божия, блаженная мати Иулитто, подвиг исповедничества сквозь тьму безбожия пронесшая и ныне у Престола Божия вкупе со всеми святыми молящаяся! Днесь к тебе прибегаем и во умилении просим тя: испроси у Господа земли нашей мира и всякаго благословения, людем же вразумления и покаяния, нам же всем твердости веры и грехов оставления, дабы по отшествии нашем возмогли мы вкупе с тобою в Царствии Небеснем восхвалити и прославити Троицу Святую, Отца, и Сына, и Святаго Духа. Аминь.